Les mots surlignés font l'objet d'une note
1Monsieur, le commensement de ma lettre sera pour vous supplier
2mexcuser si soudain après mon arrivée qui est puis deux jours en ça,
3je ne me suits acquitté de mon debvoyr pour vous fère entendre
4ma deliberation qui est de me retirer chez moy pour fère mes
5affères et là, vivre et me conduire entierement soubz lobeissance du roy
6et la votre, mayant sa majeste faict ce bien de mavoyr receu pour son
7très humble et très obeissant subgect et serviteur comme il ne mest
8jamais entré dans le cueur destre autre encore que ma bonne
9volonté mayt cuydée estre très mal recogneue ayant passé les
10dangers que jay passez, lesquelz ont estée en bien grand nombre et
11aussi perilleux quil est possible de dire ; toutesfoys Dieu ma faict
12la grace que jen suis sorti et mesmes par arrest de la court et à la
13bonne grace du roy au service duquel je desire employer ma vie
14et tout ce qui depend de moy et quant il vous plairra mhonorer
15de tant que de me commander pour le service de sa majesté et
16pour le votre particulier me trouverez aussi prest à vous rendre toute
17obeissance et daussi bonne volonté que gentilhomme qui soit mandé de
18votre part. Au demeurant monsieur, jay à vous dire comme le jour avant
19mon despart le roy avoyt assuré à monsieur de Clermont une lettre
20de faveur pour moy pour vous addresser, mais il ne se treuva
21point de secretaire à propos pour recepvoyr le commandement et je
22craignoys le soudain despart de ceulx avecques lesquelz je suis venu et
23vous supplie de croyre quil ny a rien heu qui ayt esté cause que je naye
24attendu ladite lettre que la crainte que javoys de perdre la commodité de men venir
25avecque la compagnie qui mavoyt desjà attendu quelques jours et ce que jen ay faict
26na esté pour temerité ne presumption ; nonobstant je ne suis point venu sans bon passeport
27et sauvegarde de sa majeste vous suppliant de rechef, monsieur,
28croyre que tout mon desir ne tend à autre fin que de vous rendre
29tout obeissant service et me renger du tout en tout en voz commandemens
30quand il vous plairra mhonorer de tant que de les me
31faire entendre et soubz ce ferme propos pour ne scavoyr chose
32qui merite le vous faire entendre fors la bonne santé
33[28v°] en laquelle jay laissé monsieur d’Eveynes votre frère et monsieur
34de Laval votre fils, feray fin à la presente après avoyr supplié
35le Createur vous donner,
36monsieur, en très parfaicte santé, très heureuse et longue vie,
37avecques accomplissement de voz bons desirs. Ce Xme
38de Janvier 1573, de Saint Auban, en la mayson de
39votre très humble et plus obeyssant
40serviteur à jamays
41Saint Auban